Heimastjórnin á Grænlandi:
Formaðurinn lætur heila húsakynni

Ákvörðun Jens Lyberth, formanns grænlensku heimastjórnarinnar, um að láta heila húsakynni stjórnarinnar, hefur vakið hörð viðbrögð þar í landi. Á milli jóla og nýárs fékk Lyberth konu til þess að koma og reka ill öfl úr húsinu og endurvekja hinn góða grænlenska anda. Markmiðið var að sögn Lyberths að bæta samstarfsandann meðal embættismanna heimastjórnarinnar. Heilarinn var eina og hálfa klukkustund að heila húsið og var hún þess fullviss að starf hennar hefði bæði verið þarft og borið tilskilinn árangur.
Ekki hafa allir verið á eitt sáttir um framtak Lyberth og hafa heyrst gagnrýnisraddir úr ýmsum áttum. Grænlenska fríkirkjan hefur lagt fram opinbera kvörtun til formanns landstjórnarinnar og önnur kristin trúfélög hafa lýst yfir áhyggjum sínum. Meðlimir grænlenska landsþingsins hafa sömuleiðis látið hörð orð falla um heilunina en skiptar skoðanir ríkja meðal annarra ráðamanna.
Lyberth lætur gagnrýnina að mestu sem vind um eyru þjóta og hefur hann notið stuðnings formanns landsstjórnarinnar, sem bendir á að heilun sé alltaf að verða algengari meðal almennings í landinu.

Heimild: Fréttablaðið, 8. janúar 2003.