Ungverski miðillinn Roland Roberts miðlaði leikjum í skák Kortsnojs og Geza Maroczy, sem lést árið 1951:
Kortsnoj tefldi við látinn stórmeistara

Skákmeistarinn Kortsnoj er nú enn á ný kominn til Íslands til þess að etja kappi við marga af sterkustu skákmönnum heims á heimsbikarmóti Stöðvar 2. Það fer engum sögum af því hvernig sovésk/svissneski skáksnillingurinn hefur búið sig undir þær sviptingar sem í vændum eru á taflborðunum í Borgarleikhúsinu. Gera verður þó ráð fyrir að undirbúningur meistarans sé eins góður og best verður á kosið.
Ný hlið á skákferli Korstnojs var kynnt evrópskum sjónvarpsáhorfendum s.l. laugardag í þættinum "Eine unglaubeliche geschichte" eða "Ótrúleg saga" á sjónvarpsstöðinni Radio Luxemborg (RTL). Þáttur þessi fjallaði um dulræna reynslu fólks og samband miðla við framliðna. Við hringborð í hljóðveri sátu nokkrir áhugamenn og þekktir miðlar og ræddu þessi mál fram og aftur. Meðal annars kom fram í máli stjórnandans, Rainers Holbes, sem er þekktur þýskur viðskiptajöfur, að hann hafi haft "milligöngu" um keppnisskák milli hins þekkta ungverska skákmeistara, Geza Maroczy, sem lést árið 1951, og Viktors Korsnoj. Rainer leitaði liðsinnis landa Maroczys, miðilsins Roberts Roland, til að koma á þessari skák. Roland, sem er velþekktur ungverskur miðill, náði sambandi við Maroczy, sem lýsti strax áhuga á að etja kappi við sterkan núlifandi skákmeistara. Þetta staðfesti Roland í nefndum sjónvarpsþætti.
Fyrsta vandamálið sem menn stóðu frammi fyrir, að sögn Holbes, var að fá nægilega sterkan skákmann til þess að tefla við Maroczy. Hann sagði að eftir langa leit hafi tekist að fá Kortsnoj til að tefla gegn Maroczy í þessari mjög svo óvenjulegu skák.
Ekki var getið um hvernig skákin gekk til eða hvernig henni lyktaði, en hins vegar kom fram að nefndur Holbe vinnur nú að því að skrá sögu þessarar skákar og ýmis önnur skilaboð frá Maroczy til núlifandi skákmeistara.
Tíminn reyndi marg ítrekað í gær að ná tali af Viktor Kortsnoj til þess að bera þessa frásögn ungverska miðilsins undir hann, en án árangurs. Kortsnoj lokaði sig inni á herbergi á Hótel Holiday Inn og undirbjó sig af kostgæfni fyrir harðvítug átök gegn Elvest í fyrstu umferð heimsbikarmóts Stöðvar 2. Blaðamenn fengu þau skilaboð að hann vildi ekkert við þá tala, hann mætti ekki á neinn hátt verða fyrir ónæði fyrir fyrstu skákina.
Geza Marcozy fæddist árið 1870 og fór yfir móðuna miklu árið 1951, eins og áður segir. Þegar hann var upp á sitt besta, um aldamótin, þótti hann einn snjallasti skákmaður heims. Sem dæmi má nefna að ákveðið var að hann tefldi einvígi við Lasker árið 1906 um heimsmeistaratitilinn í skák. Af því einvígi varð þó aldrei, m.a. vegna þess að ekki náðist samkomulag um keppnisstað. Verkfræðingurinn og stærðfræðikennarinn Maroczy var útnefndur stórmeistari í skák árið áður en hann dó, 1950. Við hann er kennt nokkuð snúið afbrigði af Sikileyjarvörn.
Maroczy var vel þekktur í skákheiminum fyrir fleira en að stýra taflmönnunum. Eftir að hann fluttist til Hollands og síðar Englands, eftir fyrri heimsstyrjöld, ritaði hann feiknin öll um skák og var virtur skákdómari. Til dæmis var hann yfirdómari í heimsmeistaraeinvígjum árin 1935 og 1937 milli Aljekíns og Euwes.

Heimild: Tíminn, 1988.

Gangandi skák við annan heim

Stórmeistarinn Viktor Kortsnoj er nú þátttakandi í einhverri sérkennilegustu uppákomu allra tíma í skákheiminum. Með aðstoð miðils teflir hann við framliðna, ungverska stórmeistarann Geza Maroczy, sem lést fyrir 37 árum. Leiknir hafa verið 30 leikir og er enn nokkuð eftir af skákinni.
Kortsnoj segist hafa látið til leiðast, þar sem hann trúi á líf eftir dauðann.
Tíminn kríaði út einkaviðtal við stórmeistarann í miðjum undirbúningnum fyrir baráttuna við sautján lifandi stórmeistara í Borgarleikhúsinu.

Skákmeistararnir Viktor Kortsnoj og Geza Maroczy hafa setið að tafli í tæp 4 ár:
30 leikjum lokið í skák Kortsnojs og Maroczys

"Jú, ég tel nú að ég hafi dágóða vinningsmöguleika í skákinni gegn Maroczy. Staðan var í jafnvægi í byrjun en síðan fór að halla á hann í miðtaflinu, ekki síst vegna þess að hann lék af sér manni," segir skákmeistarinn Viktor Kortsnoj um gang skákarinnar við hinn látna Geza Maroczy, en eins og Tíminn greindi frá í gær hefur ungverskur miðill, Roberts Roland að nafni, miðlað leikjum í skák Maroczys og Kortsnojs.
Það færðist bros yfir hörkulegt andlit Viktors Kortsnojs þegar blaðamaður færði þetta mjög svo sérstaka mál í tal við hann á Hótel Holiday Inn í gær.
"Heyrðu, jú, ég kannast við þetta. Eigum við ekki að segja að ég segi þér eitthvað um skákina ef þú ferð með mig í staðinn upp í verslunarhöllina, þarna við hliðina á leikhúsinu, þar sem við teflum," sagði Kortsnoj.
Vissulega voru þetta mjög svo aðgengilegir kostir fyrir undirritaðan og því var samkomulagið staðfest umsvifalaust.
Kortsnoj sagði þessa skák vissulega mjög sérstaka en hann hafi síður en svo verið því mótfallinn að reyna fyrir sér á þeim merkilega vettvangi skáklistarinnar, þar sem annar keppanda væri lifandi en hinn látinn. "Skýringin á því að ég féllst á að tefla þessa skák er einföld. Ég trúi sjálfur á líf eftir dauðann," segir Kortsnoj.
Í frétt Tímans í gær var látið að því liggja að skák Kortsnojs og Maroczys væri lokið. Því fer hins vegar víðs fjarri. Að sögn Kortsnojs hafa nú verið leiknir um 30 leikir í skákinni og ekki sér enn fyrir endann á henni.
Meistararnir settust að taflborði árið 1984 að sögn Kortsnojs og hafa verið að síðan með mismunandi löngum hléum. Kortsnoj segir enga reglu á því hve langur tími líði á milli leikja. "Það er margt sem ræður því. Ég get t.d. ekki sinnt þessu sem skyldi þegar ég tefli á stórmótum hér og þar. Einnig virðist Maroczy vera misjafnlega upplagður til að leika. Stundum hafa liðið nokkrar vikur áður en nýr leikur kemur frá honum," segir Kortsnoj. Hann segir það ekki ljóst hversu langur tími kunni að líða áður en dragi til tíðinda í skákinni. "Það er ómögulegt að segja til um hversu langur tími líður áður en úrslit fást í skákinni."
Skákmeistarinn tekur fram að hann hafi aldrei séð Roberts Roland, miðilinn sem miðlar leikjum í skák hans við Maroczy. Hann sé því ekki fær um að greina frá þeirri athöfn þegar miðillinn "sendir" leikinn yfir til Maroczy eða "móttekur" nýja leiki að handan. "Mér skilst að miðillinn kunni ekkert fyrir sér í skák, kunni ekki einu sinni mannganginn," segir Kortsnoj.
Kortsnoj kemur skilaboðum um nýja leiki símleiðis eða í bréfi áleiðis til ungverska miðilsins. Sami háttur er hafður á þegar mótleikir Maroczys hafa borist að handan.
Viktor Kortsnoj segir að þegar leitað var til hans um að tefla þessa sérstæðu skák, hafi hann nefnt fleiri nöfn en Maroczy sem hugsanlega andstæðinga. Til dæmis hafi hann nefnt menn eins og þá víðkunnu meistara Capablanca og Keres. "Þau skilaboð fengust hins vegar frá Maroczy að hann væri tilbúinn að tefla þessa skák. Þar með var það fastmælum bundið," segir Kortsnoj.
Kortsnoj segist ekki vita hvort Geza Maroczy fylgist grannt með því sem gerist í skákheiminum í dag. Það sé hins vegar alls ekki ólíklegt.
Það skyldi þó aldrei vera að þessi frægi ungverski skákmeistari fylgist í fjarlægð með gengi meistaranna í Borgarleikhúsinu? Hver veit nema að hann reyni að læra inn á einhver af klækjabrögðum Viktors Kortsnojs á skákborðinu.
[ ... ]

Heimild: Tíminn, 1988.