Gestabókin hefur verið óvirk um skeið. Ekki er ljóst hvað veldur, það verður t.d. ekki séð að neitt hafi gerst hér á síðunni sem spillir fyrir henni. Gestabókin er hýst í útlöndum hjá velviljuðum eigendum og fyrirspurn hefur verið send til þeirra. Svar hefur ekki borist enn. Ef engin skýring finnst á næstu dögum verður reynt að grípa til róttækari aðgerða. (19/1 2011)
Þeir, sem hafa smakkað hangikjötið frá Stað, eru á einu máli um að það beri af öllu öðru hangikjöti og hafa væntanlega þegar tryggt sér jólahangikjöt. Þeim, sem enn hafa ekki gert viðeigandi ráðstafanir, skal bent á hvað er í boði hjá Reykskemmunni á Stað:
| Verð | |
|---|---|
| Lambalæri og sauðalæri | 2.600 kr./kg |
| Lambalæri sauðalæri, langreykt | 2.900 kr./kg |
| Frampartar á beini, lamb og sauður | 2.000 kr./kg |
| Úrbeinaðar rúllur, frampartar, lamb og sauður | 2.600 kr./kg |
Kjötið má panta með því að senda tölvupóst á stadur@simnet.is og það verður sent, snyrtilega pakkað í lofttæmdar umbúðir. (12/12 2009)
Kristján Benediktsson sendi vefnum fyrir allnokkru gamla upptöku þar sem Gunnar á Fossi
kveður tvær vísur. Þessari upptöku hefur nú verið komið fyrir á vefnum og má
finna krækju í hana á valsinum hér til vinstri. Hljóðskráin er á sama formi og skrá
með flutningi Friðgerðar á þulu sem Kristján hafði áður sent vefnum. Umsjónarmaður
hefur ekki heyrt að neinn hafi átt í erfiðleikum með að hlusta á þá skrá en ef sú
verður raunin núna látið þá heyra frá ykkur. Vefurinn kann Kristjáni bestu þakkir
fyrir. (29/10 2009)
Viltu leggja eitthvað til málanna? |
Tilraunin til að lífga upp á vefinn með því að efna til ljósmyndasamkeppni misheppnaðist. Þar er skemmst frá að segja að ekki barst ein einasta mynd í keppnina. Umsjónarmaður vissi þó um einn ljósmyndara sem gat hugsað sér að taka þátt í keppninni en hætti við þegar ljóst var að ekki bærust aðrar myndir. Það er svo sem óþarfi að velta því fyrir sér hvað veldur, kannski var hugmyndin slæm, kannski áttu ekki nógu margir, sem hafa áhuga á að lífga upp á vefinn, leið um Barðaströnd í sumar. Hvað sem því líður mun vefurinn halda áfram að vera til og reyna að birta það efni sem honum berst frá fáeinum dyggum stuðningsmönnum. (29/10 2009)
Viltu leggja eitthvað til málanna? | Ljósmyndasamkeppni!
msjónarmaður vefsins veltir því stundum fyrir sér hvort ástæða sé til að reyna að gera vefinn áhugaverðari og draga að honum fleiri lesendur. Það er reyndar ekkert víst, kannski er allt í lagi að hann sé eins og hann er, efni bætt inn þegar eitthvað rekur á fjörur, sumir líta hér inn sér til gamans, aðrir sleppa því og missa svo sem ekki af miklu. En það hefur samt orðið ofaná hjá umsjónarmanni að reyna að fitja upp á nýjung sem ef vel tekst til gæti lífgað upp á vefinn og jafnvel eflt tengslin við upprunaslóðirnar.
Hugmyndin er, eins og ráða má af fyrirsögninni, ljósmyndasamkeppni. Reglurnar eru svo sem ekki fullmótaðar enn, hugsanlega gætu þær mótast eitthvað af undirtektum, en hér kemur fyrsta útgáfa af þeim:
Keppnin hefst nú þegar og lýkur í haust, afmælisdagur Friðgerðar, 18. september, er ágætur lokadagur. Úrslit gætu þá vonandi legið fyrir á afmælisdegi Guðmundar, 6. október. Myndirnar þarf þá að taka á þessu tímabili og senda umsjónarmanni. Þær þurfa að vera á stafrænu formi (.jpg), skannaðar ef þær eru ekki teknar á stafræna myndavél. Þær ættu helst ekki að vera mjög stórar, t.d. ekki stærri en 1024 dílar á lengri kantinn.
Myndirnar á að taka á einhverjum þeirra staða þar sem Guðmundur og/eða Friðgerður áttu heima. Hér kemur svolítil upprifjun: Guðmundur fæddist í Stóra-Laugardal í Tálknafirði, ólst upp í Skápadal við Patreksfjörð, varð ráðsmaður og síðar bóndi á Hreggstöðum. Bjó líklega um tíma á Haukabergi áður en hann varð hreppstjóri í Haga. Þaðan fluttist hann að Skálmarnesmúla, svo í Sauðeyjar, var í Flatey einn örlagaríkan vetur, síðan aftur á Haukabergi og að lokum á Fossi. Friðger&et h;ur fæddist á Grænhól en ólst upp á Siglunesi þar til hún flutti að Haga til Guðmundar. Eftir það áttu þau samleið að mestu leyti.
Umsjónarmaður mun reyna að finna gott fólk til að skipa dómnefnd og afla einhverra verðlauna. Þau mál eru þó ekki frágengin enn en vefurinn mun óska eftir leyfi eigenda myndanna til að birta innsendar myndir, t.d. í sérstöku myndaalbúmi. Eiginlegur keppnisréttur miðast við þá sem getið yrði í niðjatali ef ættarmót væri haldið í sumar en öðrum er heimilt að vera með sem gestir.
Það er von umsjónarmanns að þetta uppátæki geti orðið til þess að hvetja fólk til að fara vestur í sumar og taka góðar myndir. Hugsanlega mætti efna til einhvers konar hópferðar einhverja góða helgi en margir hafa talað um að gaman væri að endurtaka "Krossferðina". Lesendur eru hvattir til að segja skoðun sína á þessu uppátæki í gestabókinni, ef áhuginn er enginn er einfalt að hætta við!
(21/3 2009)
Árbók Barðastrandarsýslufyrir árið 2008 kom út fyrir nokkru. Hún er hið veglegasta rit að vanda, um 200 síður fullar af myndum og fróðleik að vestan. Lengsta greinin í bókinni er fyrsti hluti sögu Tálknafjarðar eftir Lýð Björnsson frá Gufudal en framhald hennar mun birtast í næstu bókum. Þá er löng grein með mörgum myndum eftir Finnboga Jónsson frá Múla á Skálmarnesi um aflögð sláturhús og slátrunarstaði í Barðastrandarsýslu. Þar er m.a. mynd af sláturhúsinu sem var á Fossi. Sú grein, sem stendur vefnum næst, er grein Jónínu Hafsteinsdóttur, "Smalað til Haukabergsréttar" en helsti heimildamaður er Ármann Einarsson.
Það er Sögufélag Barðastrandarsýslu sem gefur bókina út en ritstjóri er Daníel Hansen. Hjörleifur Guðmundsson, Hjöllum 9 á Patreksfirði afgreiðir bókina. Þeir sem vilja fræðast um liðna tíð í Barðastrandarsýslu ættu að gerast félagar í Sögufélaginu en um leið verða þeir áskrifendur að bókinni.
(4/3 2009)
Við sem vorum á ættarmóti á Reykhólum í sumar munum vel eftir frábærum veitingum Staðarbænda í heimsókninni þangað. Það er því sérstakt gleðiefni að nú býðst okkur að kaupa jólahangikjötið beint frá Stað. Reykskemman, afurðasölufyrirtæki þeirra Staðarbænda, hefur enn á boðstólum fáein lambalæri og hangikjötsrúllur sem hægt er að tryggja sér fyrir jólin. Það er þó betra að hafa hraðar hendur og hafa samband við þau Eirík og Fríðu í síma 434 7730 eða senda þeim tölvupóst á stadur(hjá)simnet.is.
Það má bæta því við að vefurinn hefur hlerað hjá þeim sem áður hafa keypt hangikjöt hjá Staðarbændum að það beri af öðru kjöti og umsjónarmaður vefsins hefur þegar tryggt sér sín læri! (15/12 2008)
Í sögunni af ættardraugnum okkar, henni Stokkfrú, kemur kletturinn Víghamar við sögu. Samkvæmt sögunni átti að vera gat í klettinum en á mynd, sem tekin var frá veginum, sást ekkert gat. Nú hefur málið verið kannað betur og skýringum bætt við söguna. Lesið hana aftur! (31/8 2008)
Ættarmótið á Reykhólum í sumar hefur nú fengið sitt pláss á valsinum hér vinstra megin með fyrri ættarmótum. Þar eru birt þau skemmtiatriði sem umsjónarmaður hefur undir höndum og eru á því formi að hægt sé að birta þau á vef og vísað í þær myndasíður sem honum er kunnugt um. Það væri kærkomið að fá meiri upplýsingar, t.d. fleiri myndir og sem flest af þeim erindum sem flutt voru um systkinin frá Fossi. Þið, sem lumið á slíku, látið endilega heyra frá ykkur!
Hér eru örfáar myndir til að lífga upp á forsíðuna:
 |
 |
 |
 |
 |
 |
(31/8 2008)
Fimmta ættarmót fólksins frá Fossi var haldið á Reykhólum 18. til 20. júlí 2008. Í undirbúningsnefnd voru þau Friðgeir Guðmundsson, Gauti Eiríksson og Kristín Ármannsdóttir og stóðu sig prýðilega. Þeim ber öðrum fremur að þakka hvað mótið heppnaðist vel þótt gestrisið heimilisfólk á Stað og aldeilis frábært veður hafi vissulega hjálpað til. Helstu atriði á dagskránni voru heimsókn að Stað, gönguferð um Reykhóla, sameiginlegt borðhald og að lokum kvöldvaka þar sem megináhersla var lögð á að kynna yngri kynslóðum sögu systkinanna frá Fossi en þau eru nú öll fallin frá. Flutt voru stutt erindi um hvert systkinanna og þætti vefnum fengur að því að fá sem flest þeirra til birtingar.
Í lok kvöldvökunnar var tilnefnd ný ættarmótsnefnd. Hana skipa Hafsteinn Hafsteinsson, Jón Garðar Sigurvinsson, Friðgerður Benediktsdóttir, Rakel Guðmundsdóttir og Kristíana Kristjánsdóttir. Varla þarf að efast um að þetta úrvalsfólk muni standa undir væntingum og komu reyndar strax fram vísbendingar um að næsta ættarmót kynni að verða haldið strax eftir þrjú ár, tengt 120 ára afmæli Friðgerðar á Fossi.
Umsjónarmaður vefsins hefur ferið á flakki síðustu viku og verður það líklega eitthvað áfram þannig að það getur dregist eitthvað að ættarmótinu verði gerð full skil hér á vefnum. Það er þó rétt að benda á nokkrar myndasíður þar sem skoða má myndir frá ættarmótinu:
| Friðgeir Guðmundsson | http://picasaweb.google.com/gfg0111/FossTtin |
| Ólafur Sigurvinsson | http://picasaweb.google.com/olafursigurvinsson/Stadur |
| Særún Ármannsdóttir | http://picasaweb.google.com/saerunarm/TtarmTReykhLum |
Væntanlega bætast fleiri myndasíður við því margir voru með myndavélar á lofti. Þeir, sem luma á góðum myndum en ekki hafa komið sér upp myndasíðum á vefnum, ættu að senda umsjónarmanni línu.
Umsjónarmaður vill að lokum þakka fráfarandi ættarmótsnefnd fyrir þann heiður sem honum og vefnum var sýndur og verður hvatning til að halda þessum vef úti eitthvað áfram. (27/7 2008)
Kæru ættingjar.
Í dag, 8. júlí, eru 10 dagar í ættarmót. Vonandi hafa sem flestir tekið þá ákvörðun að vera með að þessu sinni á Reykhólum 18. – 20. júlí nk.
Dagskrá ( í grófum dráttum):
Föstudagur 18. júlí
Mæting á svæðið..... gert er ráð fyrir að fólk mæti ýmist seint eða snemma
eftir aðstæðum hvers og eins.
Laugardagur 19. júlí
Kl.13:00 Heimsókn að Stað. Heimafólk á Stað býður öllum í heimsókn á
hlaðið, lítum í kirkjuna og þeir sem vilja geta rölt um, skroppið
niður í fjöru eða bara staldrað við á hlaðinu og spjallað.
Kl.15:00 Gönguferð um Reykhóla undir leiðsögn Gauta Eiríkssonar. Að
lokinni gönguferð er frjáls tími og þá er upplagt að skella sér í sund í
sundlauginni á Reykhólum.
Kl. 19:00 Kveikt í kolunum. Stór grill eru staðnum og nefndin sér um
kolin. Hægt að grafa læri óski fólk eftir því.
Kl. 20:00 Sameiginlegt borðhald inni í sal og að því loknu kvöldvaka. Við
vitum að í þessari ætt er fjöldinn allur af fólki með ýmsa hæfileika.
Hér með er óskað eftir atriðum á kvöldvökuna hvort sem er frá
einstaklingum, pörum, hópum eða heilu ættleggjunum. Söngur, sögur,
hljóðfæraleikur, dans, töfrabrögð, frásagnir, leikir....... hvað
sem ykkur dettur í hug.
Sunnudagur 20.júlí
Tiltekt og heimferð.
Hvað kostar þetta svo allt saman?
Ættarmótsgjaldið miðast við þá sem gista á tjaldstæðinu og er:
Fullorðnir ...................................... 2000 kr.
Unglingar (14 – 18 ára) ................ 1000 kr.
Börn .............................................. frítt
Þeir sem óska eftir að gista inni greiða aukalega 1500 kr. á mann fyrir
nóttina.
Netfangalistinn er alls ekki tæmandi svo endilega verið dugleg að
áframsenda bréfið á aðra ættingja sem hugsanlega eru ekki á listanum.
Einnig vantar ennþá upplýsingar um breytingar sem þarf að gera á
ættartalinu endilega sendið þær upplýsingar sem fyrst til okkar.
Með kveðju
Friðgeir
Gauti
Kristín
Heil og sæl öll
Fyrirspurnir hafa borist varðandi gistinguna inni og hér koma nokkrar upplýsingar um hana.
Í boði eru 10 herbergi með tveimur rúmum og vaski. Salerni og sturtur sameiginleg frammi á gangi. Nóg er til af dýnum til að bæta við ef herbergin fyllast og hægt að setja aukadýnu inn á herbergi ef einhver ætlar t.d. að sofa með barn hjá sér.
Nú þegar hafa borist nokkrar pantanir um gistingu inni svo það er betra að hafa samband við nefndina ef þið viljið tryggja ykkur gistingu í herbergi.
Verð fyrir gistinguna er 1500 kr á mann fyrir eina nótt og greiðist til viðbótar við ættarmótsgjaldið sem er 2000 kr. á mann (frítt fyrir börn á aukadýnum inni)
(dæmi: 2 nætur inni + ættarmótsgjald = 5000 kr.).
Með kveðju
NEFNDIN
p.s. nú eru 9 dagar í ættarmót !!
(11/7 2008. Eins og sjá má í þessum innleggjum frá ættarmótsnefnd voru þau skrifuð 8. og 9. júlí. Vegna fjarveru umsjónarmanns frá tölvum og neti eru þau svolítið seint á ferðinni)
Vefnum hefur borist bréf frá Kristjáni Benediktssyni og fer texti þess hér á eftir. Um leið er rétt að taka fram að svo virðist sem umsjónarmaður hafi tekið rangt eftir þegar skipað var í núverandi ættarmótsnefnd því flestum ber saman um að Kristján hafi verið skipaður í hana en ekki Ísak Jónsson eins og lesa hefur mátt á vefnum undanfarin ár. Er hér með beðist velvirðingar á þessum ruglingi. En hér kemur texti Kristjáns. (11/2 2008)
Ættfaðirinn Guðmundur Jónsson er fæddur í Stóra-Laugardal í Tálknafirði árið 1853 (e.t.v. 1852), eða fyrir 155 árum. Á fyrri ættarmótum hefur verið leitast við að líta á þær slóðir sem Guðmundur og Friðgerður fæddust, ólust upp, komu eða dvöldu á, og því gæti verið vel til fundið í þetta sinn, að kanna nýjar slóðir og heimsækja fæðingarstað Guðmundar í Tálknafirði og uppeldisstað hans í Skápadal.
Ættarmótsnefnd sú sem kjörin var á síðasta ættarmóti komst ekki að einróma niðurstöðu. Í mestu vinsemd snerust ólík sjónarmið í nefndinni fyrst og fremst um, hvort ættarmót okkar væri ,,rækt við rætur okkar” fyrst og fremst, eða hvort sé ,,stutt á mótsstað,” svo sem flestir ættu auðvelt með að mæta. Allir töldu bæði sjónarmiðin eiga rétt á sér, en út frá ólíkum forsendum.
Margir utan nefndarinnar, sem rætt var við, vildu ekki taka afstöðu. Meirihlutinn í ættarmótsnefndinni nú styður síðara sjónarmiðið, stutt á móttsstað frekar en rækt við rætur okkar.
Minnihlutinn efnir engu að síður til niðjamótsins Rækt við rætur okkar á Tálknafirði helgina 11.-13. júlí n.k., sjá mynd hér.
Þessu niðjamóti er á engan hátt beint gegn ættarmótinu á Reykhólum, sem er frábær staður, og þeim sem að því standa óskað alls hins besta, heldur af eftirtöldum ástæðum:
Þessi tvö ólíku ættarmót þurfa ekkert að stangast á, heldur höfða þau til ólíkra markhópa í ættinni, og ættu því að stuðla að því að sem flestir fengju eitthvað við sitt hæfi og áhugamál. Þar að auki eru þetta tvær aðliggjandi helgar, og sumir, sem e.t.v. eru í sumarfríi geta komið á báða staðina.
Sumir segja að gjáin milli þeirra sem vilja rækta ræturnar og hinna sem vilja hafa það sem þægilegast og hafa stutt á móttsstað, liggi milli kynslóða, gamla fólkið velji rætunar, en unga fólkið það auðvelda. Þessu er Ásta Sól Kristjánsdóttir ósammmála. Starf hennar byggist á hinu gagnstæða. Hún tekur á hverju sumri á móti og skipuleggur ferðir ungs fólks frá Bandaríkjumum og Kanada, sem er að leita róta sinna á Íslandi (http://www.snorri.is/) . Væri ekki best, ef aðalatriðið er að fá sem flesta til að mæta, að hafa ættarmótið á Tjaldstæðinu í Laugardal, spyr hún. Sjá Morgunblaðsviðtal við hana um uppgötvun róta sinna á Vestfjörðum hér. (11/2 2008)
Kæru ættingjar.
Nú fer að styttast í næsta ættarmót en það verður í sumar að Reykhólum helgina 18. – 20 júlí. Fyrirhuguð er mæting á föstudagskvöldi og gert er ráð fyrir að flestir gisti í tjöldum en hægt verður að gista inni fyrir þá sem það vilja.
Létt dagskrá verður á laugardeginum og kvöldvaka um kvöldið. Sameignlegt borðhald verður einnig á laugardagskvöldið og verður sami háttur á því og verið hefur á síðustu ættamótum. Hver fjölskylda kemur með mat á grillið og meðlæti.
Ætlunin er að safna saman efni um Friðgerði og Guðmund en einnig börn þeirra þar sem þau eru öll látin. Óskum við því eftir fólki sem er tilbúið að semja stuttan texta um hvert þeirra. Vinsamlegast látið okkur í nefndinni vita sem fyrst. Hugmyndin er að lesa þessa texta upp á ættarmótinu þar sem margir úr ættinni þekktu þau ekki öll og æskilegt að að safna þessari þekkingu saman á meðan minningin um þau er enn lifandi.
Næstu vikur verður farið í lagfæringar á niðjatalinu og óskum við eftir upplýsingum um breytingar á niðjatalinu. Hægt er að senda breytingar á okkur í nefndinni.
Viljum við biðja fólk um að senda þetta bréf á sem flesta þannig að allir viti hvað er í gangi. Einnig væri gott ef við fengjum netföng frá sem flestum.
Nefndin
Friðgeir Guðmundsson fridgeir@akmennt.is
Gauti Eiríksson gautie@mi.is
Kristín Ármannsdóttir kristinarm@rimaskoli.is
(14/3 2008)
Systir Anna Pauline, sem var samtíða frænku okkar, systur Jóhönnu, og sagt er frá hér á vefnum í pistli Jónínu Hafsteinsdóttur, "Á slóðum systur Jóhönnu", lést síðastliðið haust. Jónína hefur nú bætt nokkrum línum við pistilinn með fróðleik um systur Önnu Pauline. (13/2 2008)
Nú hafa borist gleðifregnir frá ættarmótsnefndinni! Umsjónarmanni vefsins bárust eftirfarandi skilaboð frá sínum fulltrúa:
Ættarmótið verður á Reykhólum helgina 18.-20. júlí. Nánari upplýsingar eru væntanlegar fljótlega en nefndin óskar eftir að fá send netföng sem flestra til að hún geti komið upplýsingum á framfæri. Ef einhver er í vafa um hvert á að senda þau er vefurinn reiðubúinn að hafa milligöngu þar um. Þeir sem vilja nýta sér það smelli hér!
Svo er bara að taka helgina frá og fara að hlakka til! (9/2 2008)
Umsjónarmaður var svolítið seinheppinn við síðustu færslu. Ekki var hann fyrr búinn að hvetja ykkur til að nota gestabókina til að eggja ættarmótsnefndina til dáða en boð bárust frá Þjóðverjunum sem hýsa gestabókina um það að henni yrði lokað eftir fáeina daga! Þeir voru þó svo hugulsamir að gefa kost á að sækja allt innihald gestabókarinnar í hefðbundnu vefskjali og hefur því nú verið komið fyrir bak við krækjuna "Gamla gestabókin" hér til vinstri. Krækjan "Gestabók" vísar hins vegar í nýja gestabók sem sett hefur verið upp og dugir vonandi ekki síður en sú gamla gerði. Athugið að til þess að koma færslu inn í gestabókina þarf að slá inn "öryggislykil" sem birtist á mynd ofan við hnappinn "Skrifa í gestabók". Mörgum þykir þetta hvimleitt en vonandi verður það ekki til að draga úr notkun. Látið endilega vita ef þið lendið í einhverjum erfiðleikum með að skrifa í gestabókina! (13/10 2007)
Fyrsta ættarmót fólksins frá Fossi var haldið sumarið 1991 og þótti takast svo vel að ákveðið var að ættarmót skyldu framvegis verða fjórða hvert ár. Síðasta ættarmótsnefnd var reyndar svolítið róleg í tíðinni þannig að fimm ár liðu milli ættarmóta. Það þótti greinilega ekki til eftirbreytni og ættarmótinu á Skildi lauk með því að valin var ný nefnd til að halda ættarmót sumarið 2008. Á síðunni hér á vefnum, sem líta má á sem eins konar fundargerð síðasta ættarmóts, stendur: "Nýju nefndina skipa: Friðgeir Guðmundsson, Gauti Eiríksson, Ísak Jónsson, Kristín Ármannsdóttir og Marsveinn Lúðvíksson. Marsveinn var þó tilnefndur með fyrirvara um að hann gæti og vildi taka þetta að sér þar eð hann var ekki á staðnum".
Umsjónarmaður vefsins hefur orðið var við að ýmsir eru farnir að hlakka til ættarmótsins, má t.d. sjá merki um það hér í gestabókinni. Fólk er farið að reyna að rifja upp hverjir muni vera í nefndinni og hver muni kalla hana saman. Vefurinn veit ekki hvernig þau mál standa en ef nefndin vill nýta sér þennan vettvang til að koma upplýsingum til ættingjanna er það að sjálfsögðu velkomið. Sendið bara umsjónarmanni tölvupóst og hann verður birtur hér. Öðrum er bent á að nýta gestabókina til að hvetja nefndina til dáða.
Umsjónarmaður vefsins sat í síðustu nefnd og telur sig því geta gefið nýju nefndinni það ráð að draga ekki of lengi að hittast. Það sem fyrst þarf að gera er að ákveða stað og stund fyrir ættarmótið. Gamla nefndin hélt sinn fyrsta fund í lok janúar og þá var þegar orðið erfitt að finna góða staði sem gátu tekið við okkur á þeim dögum sem okkur hentaði. Því fyrr sem gengið er frá þessum grundvallaratriðum, því betra.
(11/10 2007)
Vefnum hefur borist eftirfarandi bréf (21/3 2007):
Komið þið sæl.
Þessa dagana erum við að safna saman og koma á prent ljóðunum hans
Manna, Jóns Snæbjörnssonar, frá Mýrartungu. Þess vegna viljum við
biðla til ykkar, að þið hristið upp í minninu, kíkið í gamlar
gestabækur, skoðið gömul heillakort og sjáið hvort einhversstaðar
leynist ljóð eða vísa eftir hann. Ef svo er, þætti okkur vænt um að
þið kæmuð því til okkar. Með tölvupósti, bréfapósti eða í gegnum síma.
Með fyrirfram þakklæti,
Aðalheiður Hallgrímsdóttir Veghúsum 31 #906 112 Reykjavík
s. 567 0904
netfang: heidahallgrims@vortex.is
P.S. Getum ekki farið fram á þetta nema leyfa ykkur að njóta aðeins
vísnanna hans:
Víst elska ég Staðinn og allt sem þar lifnar og grær Hérna á Fossi var lífinu lifað |
Árbók Barðastrandarsýslu 2006 kom út fyrir nokkru. Sem fyrr er það Sögufélag Barðastrandarsýslu sem gefur bókina út og ritstjóri er Daníel Hansen. Þarna er að finna mikinn fróðleik um mannlíf og sögu í Barðastrandarsýslu enda er lesmáli og myndum raðað þétt á rúmar 200 síður.
Ein grein í bókinni stendur lesendum þessa vefs nær en aðrar. Hún heitir "Bundið mál" og fjallar um Jón Snæbjörnsson sem við þekkjum sem Manna í Mýrartungu eða Manna frá Stað. Dóttir hans, Ólína Kristín, skrifar stutt æviágrip og birt eru nokkur ljóða hans en eins og við vitum átti hann ákaflega létt með að yrkja og eftir hann liggur talsvert af ágætum og bráðskemmtilegum ljóðum. Eitt lítið sýnishorn af kveðskap hans má finna hér á vefnum meðal söngtexta á síðasta ættarmóti:
Óður til ReykhólasveitarTexti: Jón SnæbjörnssonLag: Ég leit eina lilju í holtiAð áfellast guðanna gerðir |
Fram kemur í greininni að fjölskylda Manna hafi hug á að koma ljóðum hans í bók og er það vel. (23/2 2007)
Halldóra Marteinsdóttir, ein af systkinunum frá Siglunesi, var nunna mestan hluta ævinnar og tók sér heitið systir Jóhanna. Hún starfaði bæði á Landakotsspítala og St. Jósefsspítala í Hafnarfirði. Hún lést árið 1944. Þær mæðgur Jónína og Særún brugðu sér til Kaupmannahafnar í haust, leituðu uppi móðurhús St. Jósefssystra og hittu þar meðal annars að máli háaldraða systur sem hafði unnið með systur Jóhönnu og mundi eftir henni. Ferðasöguna má lesa með því að smella hér eða á krækjuna í valsinum til vinstri.
Stærri útgáfu af myndinni hér til hliðar má sjá á myndavefnum.
(23/1 2007)
Neðarlega á valsinum hér til vinstri má finna krækjuna "Áhugaverðir vefir". Þar var ætlunin að safna saman krækjum í ýmsa vefi sem tengdust ættingjum, svo sem barnavefi, bloggsíður, kynningar og fleira. Fáeinar krækjur rötuðu þarna inn þegar síðan var sett á laggirnar en þrátt fyrir óskir um að umsjónarmaður fengi að frétta af fleiri slíkum síðum hefur ekkert bæst við. Nú er umsjónarmanni kunnugt um fáeinar bloggsíður sem ættu heima þarna og jafnvel heilt gallerý og búast má við að síðan verði uppfærð fljótlega. Þó hljóta svona síður að vera orðnar miklu fleiri og eru þeir, sem vita um vefsíður sem þeir telja að ætti að kynna þarna, hvattir til að koma skilaboðum þar um til umsjónarmanns! (8/4 2006)
Umsjónarmaður vefsins hefur ákveðið að gera tilraun til að gefa ættingjunum færi á að koma auglýsingum á framfæri. Kynnið ykkur málið með því að smella á tengilinn Auglýsingar neðan við gestabókina! (16/12 2005)
Viltu leggja eitthvað til málanna? |
Vefnum hefur borist erfiljóð sem Guðmundur H. Siguðsson á Brekkuvelli orti þegar Frigerður var kvödd í nóvember 1969. Krækju í síðuna er að finna undir fyrirsögninni "Annar fróðleikur" hér til vinstri. (26/9 2006)
Á árunum 1951 til 1969 lá bílvegurinn vestur á Barðaströnd um Þingmannaheiði. Sum okkar, sem fórum um þann veg, muna sjálfsagt eftir myndarlegum vörðum meðfram veginum. Nú hefur komið í ljós að þessar vörður tengjast okkur meira en okkur grunaði þá. Það má lesa nánar um þetta með því að nýta krækjuna á valsinum hér til vinstri. (14/4 2006)
Nú hefur mynd af Víghamri verið bætt á síðuna um ættardrauginn Stokkfrú. Hamarinn er rétt við veginn og tilvalið að skoða hann þegar farið er hjá. (12/2 2006)
Á vefnum hefur lengst af mátt skoða gamlar myndir frá Fossi og af fólki tengdu staðnum. Þessi myndavefur hefur nú fengið svolitla andlitslyftingu. Myndir og myndatextar eru reyndar að mestu óbreytt þótt sumar hafi reyndar fengið létta meðferð í myndvinnsluforriti. Myndasíðurnar sjálfar hafa hins vegar breyst, vonandi til hins betra, og niðurröðun í efnisflokka hefur einnig verið endurskoðuð. Umsjónarmaður vonar einnig að þessi breyting valdi ekki tæknilegum erfiðleikum hjá neinum en við hönnun á síðunum hafa verið notaðar svonefndar rammasíður sem margir vefsmiðir finna allt til foráttu. Látið endilega heyra frá ykkur, hvort sem þið eruð ánægð eða óánægð með þessar breytingar. Og það er rétt að minna á að fleiri myndir væru vel þegnar, hafið þið ekki skyggnst neitt í gömul fjölskyldualbúm um hátíðarnar? (8/1 2006)
Viltu leggja eitthvað til málanna? |
Vissuð þið að við eigum okkur ættardraug og hann ekki af verri endanum? Draugurinn sá heitir Stokkfrú og gengur á dönskum skóm. Nú má finna á vefnum fróðleik um þennan draug en vonandi verður það ekki til þess að draugagangur upphefjist á vefnum! Jónína Hafsteinsdóttir á allan heiður af því að hafa aflað þessara heimilda og sent vefnum. (8/1 2006)
Viltu leggja eitthvað til málanna? |
Árbók Barðastrandarsýslu 2005 er nýkomin út. Þetta er mikil bók, 288 síður, full af alls konar fróðleik að vestan. Bókin er að þessu sinni sérlega áhugaverð fyrir lesendur þessa vefs því í henni er löng grein um Ólaf Marteinsson magister eftir Jónínu Hafsteinsdóttur. Ólafur var yngstur systkinanna frá Siglunesi, fæddur árið 1899. Þrátt fyrir sára fátækt tókst honum að afla sér menntunar, hann lauk prófi í íslenskum fræðum frá Háskóla Íslands og á bréfaskiptum hans við þá sem fremstir þóttu í þeim fræðum má glöggt sjá að hann þótti mjög efnilegur fræðimaður. Hann var í þann veginn að hefja starfsferil við Óslóarháskóla þegar hann veiktist alvarlega og náði aldrei aftur fullri heilsu. Hann lést fáum árum síðar, tæplega 35 ára gamall.
Greinin skiptist í stórum dráttum í þrjá hluta. Fyrst er sagt frá systkinunum á Siglunesi, uppvexti þeirra og hvernig tókst með góðra manna hjálp að komast hjá því að nokkur úr þessum stóra, foreldralausa systkinahóp færi á sveitina. Næst er rakinn æviferill Ólafs, sagt frá námi hans í menntaskóla og síðar í háskóla. Á háskólaárunum fór hann í námsferð til Noregs og er talsvert sagt frá dvöl hans þar og rakin bréfaskipti hans við ýmsa merka menn. Birtir eru kaflar úr bréfum hans, sumir stórskemmtilegir. Einnig er sagt frá seinni ferð hans til Noregs, sem varð svo sorglega styttri en til stóð, og frá síðustu árum hans heima á Íslandi. Í þriðja hluta greinarinnar er rakinn fræðimannsferill Ólafs og er þar í millifyrirsögnum minnst á lausavísnasöfnun, handritasöfnun og skráningu þjóðsagna en af þeim má ráða nokkuð um hans helsta áhugasvið.
Greinin er tæpar 40 síður með nokkrum myndum. Þar á meðal er myndin hér til hliðar en hana tók Hallgrímur Einarsson ljósmyndari á Akureyri árið 1925.
Ættingjar Ólafs, sem fylgjast með þessum vef, ættu hiklaust að verða sér úti um árbókina og lesa greinina sér til fróðleiks og skemmtunar. Félagar í Sögufélagi Barðastrandarsýslu hafa væntanlega þegar fengið hana senda í pósti en aðrir þurfa að gera einhverjar ráðstafanir til að nálgast hana því hún er því miður ekki seld í bókabúðum. Í "Sumarliða pósti", málgagni Barðstrendingafélagsins, var fólki bent á að hafa samband við Snorra Jóhannesson í síma 555 1721 eða Daníel Hansen í síma 435 6858 ef það vildi eignast bókina en einnig má hafa samband við formann Sögufélags Barðstrendinga, Úlfar B. Thoroddsen gegnum netföngin ulfar@hsp.is eða utb@simnet.is. Bókin mun kosta 3000 kr. en félagar í Sögufélaginu munu fá hana á mun lægra verði. (15/12 2005)
Umsjónarmaður vefsins átti í dag leið í Bókabúðina Hamraborg í Kópavogi og komst þá að því að þar voru til a.m.k. fjögur eintök af Árbók Barðastrandarsýslu 2005 og kostuðu 2990 kr. Fullyrðingar hér fyrir ofan þess efnis að bókin fáist ekki í bókabúðum eru því sem betur fer ekki réttar! (20/12 2005)
Viltu leggja eitthvað til málanna? |
Vefurinn hefur nú lifað sín önnur áramót. Þótt nokkuð líði stundum milli þess að nýtt efni birtist á vefnum verður hann að teljast á lífi og þess verður vart að hann er nokkuð lesinn þó að lesendur mættu vera iðnari við að skrá sig í gestabókina.
Lesendur þessa vefs eru væntanlega dálítið forvitnir um átthagana. Þeim gæti því vel verið fengur í að líta í bókina "Sú kemur tíð" sem kom út fyrir nokkru hjá bókaútgáfunni Kjóamýri. Þar rekur Kristján Þórðarson á Breiðalæk endurminningar sínar. Á vefsíðu "Bókatíðinda" stendur eftirfarandi um bókina:
"Það vakti athygli á sínum tíma er Alþýðuflokksmaðurinn Kristján Þórðarson stofnaði nýbýli á Breiðalæk vestur á Barðaströnd, þegar fólksstraumurinn lá úr sveitunum til þéttbýlisins. Kristján fæddist í torfbæ, foreldrarnir voru leiguliðar með níu börn, eftir fermingu tók vinnan við. Hvað var að borða, í hvaða fötum gekk fólk og hvernig átti að borga fyrir lífsnauðsynlegan uppskurð á Landspítalanum?
Hér segir vestfirskur bóndi, sem lengi var í forystusveit heimabyggðar sinnar, frá æviferli sínum á hefðbundinn íslenskan máta."
Bókin er ágætlega úr garði gerð og með mörgum myndum. Það má því vel mæla með henni hér sem áhugaverðri lesningu fyrir þá sem vilja kynna sér sögu Barðastrandar síðan á fyrri hluta síðustu aldar. (13/11 2005)
Nánari upplýsingar um bók Krisjáns má fá á vef bókaútgáfunnar Kjóamýrar, http://asp.internet.is/snaebjornk
Nú er sem sagt komið að því sem alltaf mátti búast við að gerðist og það heldur fyrr en seinna: Leitarvélar hafa fundið vefinn okkar. Ef einhver orð af vefsíðunum eru slegin inn sem leitarorð í Google leiðir leitarvélin þann sem leitar beint inn á þessar síður. Hingað til hafa fáir aðrir en ættingjar vitað um slóðina en nú getur hver sem er rekist á hana við leit að einhverju efni og lesið allt sem hér er að finna.
Þetta þarf í sjálfu sér ekki að vera slæmt. Eðli vefsins er að vera öllum opinn og langflestir vefir eru þannig gerðir að hver sem er getur skoðað þá. En þetta eru samt svolítil tímamót í ferli vefsins og ef til vill er ástæða til að staldra aðeins við og meta hvernig við viljum bregðast við þessu. Ýmsar leiðir koma þar til greina.
Áður en lengra er haldið er rétt að geta þess að enn hafa mjög fáir fundið vefinn á þennan hátt. Upplýsingar á vefsíðum sem tengdar eru teljaranum gefa hugmynd um heimsóknir leitarvéla og þær eru enn teljandi á fingrum. Þar af eru allnokkrar til komnar við að umsjónarmaður og aðrir sannreyndu að vefurinn fyndist. Þá er vitað um einn heiðursmann sem rakst á vefinn við leit að upplýsingum um stað sem tengist ættinni og var meira að segja svo kurteis að hann hafði samband við einn ættingjanna og lét vita að hann hefði gægst hér inn.
Einföldustu og að flestu leyti eðlilegustu viðbrögð eru að gera ekki neitt. Gæta þess aðeins að allt efni á vefnum sé þannig úr garði gert að það skaði engan þótt það sé opið öllum. Þetta er reyndar sú ritstjórnarstefna sem umsjónarmaður telur sig hafa fylgt. Hún er t.d. ástæða þess að niðjatalið, sem dreift var á ættarmótinu í fyrra, er ekki komið á vefinn. Þar gætu hugsanlega leynst persónulegar upplýsingar sem einhverjir kærðu sig ekki um að bornar væru á borð fyrir hvern sem er. Ef þessi leið verður valin væri þó rétt að sem flestir litu yfir efni vefsins og bentu umsjónarmanni á það efni sem þeir teldu ekki eiga erindi fyrir almenningssjónir.
Önnur leið gæti hugsanlega verið að læsa vefnum eða einhverjum hluta hans með lykilorði. Kæmi t.d. til greina að læsa gestabókinni? Það væri vissulega hægt að setja upp sameiginlegt notendanafn og lykilorð sem væri dreift til allra ættingja og þeir beðnir að halda því fyrir sig. Umsjónarmaður verður að viðurkenna að sú leið freistar ekki mjög, einkum þar sem gestabókin virðist ekki mjög mikið notuð þessa dagana.
Hugsanlega mætti villa um fyrir leitarvélunum með því að breyta slóðum og vinna þannig einhvern tíma, kannski annað ár í friði fyrir umheiminum. Það yrði þó engin endanleg lausn, aðeins frestur.
Svo væri hægt að bregðast svo hart við að loka vefnum með öllu. Það mætti prenta síðurnar, setja þær í möppu og læsa þær niðri með öðrum fjölskyldualbúmum. Þá sér þær enginn!
Eins og þið hafið sjálfsagt þegar lesið milli línanna er umsjónarmaður hlynntastur því að vefurinn verði áfram opinn og öllum verði heimilt að skoða hann og nota í frómum tilgangi. Það er einfaldast að halda honum við þannig en það má vel hugsa sér að endurskoða eitthvað það efni sem nú er á honum. Ef óviðeigandi athugasemdir rata í gestabókina er einfalt að fjarlægja þær, svo framarlega sem umsjónarmaður fréttir af þeim. Það þarf hins vegar að hafa það í huga að það, sem skrifað er í gestabókina, er aðgengilegt fyrir alla.
Látið endilega frá ykkur heyra um það hvernig þið viljið að brugðist verði við. Skrifið í gestabókina eða sendið umsjónarmanni tölvupóst ! (30/9 2005)
Umhyggjusamir sveitungar höfðu orð á því í vetur að þeim þætti leiði Gunnars á Fossi í Hagakirkjugarði lítill sómi sýndur. Viðbrögð ættingjanna urðu þau að ákveðið var að kaupa kross og setja hann á leiðið þrátt fyrir að aðrir hefðu lýst því yfir að þeir myndu setja þar legstein. Krossinn var keyptur og nokkrir ættingjar sammæltust um að fara með hann vestur og koma honum fyrir á sínum stað helgina 17.-19. júní.
Úr þessu varð hið ágætasta ættarmót þótt smátt væri í sniðum, aðeins 10 þátttakendur. Hópurinn kom sér fyrir á ágætu tjaldstæði rétt ofan við Flókalund. Barðaströndin skartaði sínu fegursta þótt aðkoman að Fossi væri reyndar ömurlegri en nokkru sinni fyrr og jafnvel bjartsýnustu menn hljóti nú að fara að gefa upp vonina um að hægt verði að bjarga bænum frá algjörri eyðileggingu. Fólk fann sér ýmislegt til skemmtunar. Að kvöldi þjóðhátíðardagsins var sameiginleg grillmáltíð í nýþjóðlegum stíl. Laugardaginn nýtti hver eins og hugurinn girntist, svo sem í öku-, göngu- eða sundferðir, en deginum lauk með sameiginlegri máltíð í Flókalundi. Á sunnudag hélt hver til síns heima og hefur ekki annað frést en að heimferðir hafi gengið vel þó að hvassviðri væri nokkuð til leiðinda.
Nokkrar myndir voru teknar í ferðinni og dálítið sýnishorn þeirra má sjá með því að smella á litlu myndina hér fyrir ofan. Þeir, sem luma á góðum myndum úr ferðinni, eru hvattir til að koma þeim til umsjónarmanns svo hægt verði að leyfa fleirum að njóta þeirra! (4/7 2005)
Vefurinn lifði veturinn af, einhverjir líta enn inn öðru hverju og svolítið hefur bæst við af nýju efni á síðustu mánuðum. Það getum við öðrum fremur þakkað Nínu og Kristjáni sem hafa gaukað að okkur fróðlegum pistlum og ágætum gömlum myndum. Vonandi verður framhald á og gaman væri ef fleiri græfu upp eitthvert efni okkur til fróðleiks eða skemmtunar. (22/4 2005)
Um miðjan febrúar voru birt hér á forsíðunni línu- og stöplarit þar sem sjá mátti áhuga ættingjanna á vefnum, varla leið svo dagur að ekki liti einhver inn, væntanlega í leit að fróðleik eða skemmtun eða til að efla tengslin við uppruna sinn.
Ekki voru þessar myndir fyrr komnar fram og farnar að gleðja velunnara vefsins en fyrirtækið, sem hafði boðist til að hýsa teljarann, tók upp á þeim óskunda að breyta öllu sínu viðmóti. Í fyrstu varð teljarinn óvirkur en vaknaði svo aftur til lífsins og taldi nú margfalt hraðar en áður. Sennilega var munurinn sá að áður var reynt að telja hvern gest aðeins einu sinni en eftir breytingu hækkaði teljarinn um einn í hvert sinn sem komið var inn á forsíðuna, t.d. eftir að hafa skoðað aðrar síður. Og í þokkabót hurfu allar leiðir til að skoða talninguna nokkuð nánar, t.d. að sjá hvernig gestir skiptust á daga.
Að lokum þraut þolinmæði umsjónarmanns og hann ákvað að skipta um teljara. Eftir að hafa leitað á netinu að öðrum teljurum datt hann ofan á einn sem virðist við fyrstu sýn miklu betri en sá gamli. Hann er nú kominn á sinn stað og farinn að telja. Ekki var hann þó látinn byrja á núlli heldur giskaði umsjónarmaður á að nú hefði gestafjöldi getað verið kominn nálægt sjö hundruðum miðað við aðsókn í janúar og febrúar. Teljarinn var því stilltur á upphafstöluna 700 og verður aldrei hægt að sanna að nein önnur tala sé réttari.
Nú verður reynt að telja gesti á svipaðan hátt og áður var gert. Sá, sem fer út af síðunni og kemur inn aftur verður ekki talinn á ný nema 2 klst. líði á milli, annars telst það sama heimsókn. Reyndar er líka hægt að telja flettingar á forsíðunni, sú tala er geymd og verður kannski birt til samanburðar síðar þegar teljarinn hefur gengið dálítinn tíma. (22/4 2005)
Það hefur verið fremur rólegt kringum vefinn undanfarnar vikur eins og sjá má á því að aðeins ein síða hefur bæst í safnið það sem af er þessu ári. Þrátt fyrir þetta hafa lesendur verið okkuð iðnir að líta á vefinn, sumir væntanlega til að skoða það efni sem þar er en aðrir til að gá hvort nokkuð nýtt hafi bæst við. Teljarinn á forsíðunni gefur nokkuð góða mynd af því hvernig vefurinn er notaður en á þeim tölum, sem hann skilar, má sjá að varla líður svo dagur að ekki líti einhver á vefinn. Á eftirfarandi súluriti má sjá hve margir hafa litið á vefinn hvern dag síðan teljarinn tók til starfa.
Eyðan í súluritinu um miðjan nóvember stafar af því að teljarinn var óvirkur af tæknilegum og óviðráðanlegum ástæðum. Annars hefur teljarinn verið í góðu lagi og hér sést að það hafa aðeins liðið tveir dagar án þess að nokkur hafi litið á vefinn. Aðsóknin virðist hafa staðið nokkurn veginn í stað síðan snemma í desember en fyrir þann tíma var hún nokkru meiri (háa súlan 31. október stafar af tíðum heimsóknum umsjónarmanns meðan hann var að koma teljaranum fyrir). Að meðaltali hefur vefurinn verið heimsóttur 25 sinnum á viku. Þetta hlýtur að teljast nokkuð góð aðsókn miðað við það hve lesendahópurinn er lítill og bendir til að vefur af þessu tagi eigi nokkurn tilverurétt.
Gestabókin segir líka sitt um notkunina á vefnum. Nú styttist í að henni hafi verið flett 1000 sinnum síðan hún var opnuð um mánuði fyrir ættarmótið í sumar. Á eftirfarandi línuriti sést þó að heldur hefur dregið úr lestri á henni síðustu fjóra mánuði.
Vefurinn þarf væntanlega að þróast áfram til að halda við áhuga lesenda. Nýtt og áhugavert efni verður að birtast öðru hverju. En hvers konar efni ætti að leggja áherslu á? Á vefurinn öðru fremur að huga að gömlum tíma og grafa upp gamlar myndir og annað sem tengist Fossi? Eða á hann að snúa sér að nútímanum og flytja fréttir af núlifandi afkomendum þeirra Friðgerðar og Guðmundar? Á hann kannski að gera hvort tveggja? Ef þið hafið skoðanir á þessu væri vel til fundið að viðra þær í gestabókinni eða senda umsjónarmanni tölvupóst. Hann væri reyndar vís til að fara sínu fram hér eftir sem hingað til og birta það sem honum sýnist! (4/2 2005)
Vefurinn óskar öllum lesendum sínum gleðilegs árs og þakkar ánægjuleg samskipti á liðnu ári. Ber þar fyrst að nefna vel heppnað ættarmót að Skildi í Helgafellssveit en einnig ágæt framlög til vefsins, hugmyndir og hvatningu af ýmsu tagi. Þótt ættarmót sé tæpast á döfinni á þessu ári vonast umsjónarmaður vefsins til að ættingjarnir haldi áfram að líta á hann öðru hverju og leggja til efni eða hugmyndir að efni sem þeir vildu sjá birtast á vefsíðunum. (10/1 2005)
Nokkrar gamlar myndir hafa bæst við á myndasíðurnar. Munar þar mest um að Mummi er kominn á fullt að skanna myndir en einnig bárust myndir frá Stað. Það eru fáein spurningamerki í myndatextunum. Allar upplýsingar sem gætu orðið til að fækka þeim eru vel þegnar! (4/12 2004)
Fjórar gamlar myndir frá Fossi, sem Guðmundur H. Friðgeirsson sendi, hafa nú bæst á vefinn. Það mun vera von á fleiri myndum úr þeirri áttinni. Við hlökkum til! (28/11 2004)
Guðmundur H. Friðgeirsson sendi umsjónarmanni leiðréttingar á nokkrum myndatextum en hann hafði skoðað myndirnar frá Fossi með móður sinni, Þuríði. Hún var húsfreyja á Fossi 1944-1947 og er því einn áreiðanlegasti heimildarmaður sem völ er á nú. Þessar leiðréttingar haf nú verið færðar inn á myndasíðurnar og það er því full ástæða til að skoða þær einu sinni enn, þar hafa ýmsir skipt um nöfn! Reyndar hefur öllum spurningum ekki verið svarað enn og öll aðstoð við að þekkja fólk á myndum, svo og upplýsingar um ljósmyndara og ártöl er vel þegin. (12/11 2004)
Í apríl 1964 var Friðgerður á ferð í Reykjavík og einn af viðkomustöðunum var að sjálfsögðu Barmahlíð 55. Kristján Benediktsson tók þá upp á segulband flutning hennar á gamalli þulu og einni vísu. Hann hefur nú fært þessa upptöku í stafrænan búning og býður ættingjunum að heyra. Krækju í þennan gullmola má finna hér vinstra megin á síðunni og kunnum við Kristjáni bestu þakkir fyrir.
Það ættu flestir að geta spilað þetta vandræðalaust. Þegar smellt er á krækjuna kemur hljóðskráin og finnur væntanlega hentugan spilara á tölvunni. Þá er bara að gæta að því að kveikt sé á hljóðinu!
Skráin er reyndar nokkuð stór og það gæti tekið nokkurn tíma að draga hana gegnum hægfara tengingar. Í slíkum tilvikum gæti verið heppilegra að sækja hana á vefinn í eitt skipti fyrir öll og vista hana á eigin tölvu. Til þess að gera það er smellt á krækjuna með hægri músarhnappi, valið "Save target as..." og skráin síðan vistuð á skynsamlegum stað þar sem hún finnst aftur! (28/10 2004, leiðrétt 31/10 2004)
Nú hafa bæst nokkrar gamlar myndir á myndasíðurnar. Þær eru komnar úr ýmsum áttum en sumar þeirra fundust í fórum Gunnars á Krossholtum þegar farið var gegnum eigur hans þar í fyrravor (leiðrétting, hér stóð áður að myndirnar hefðu fundist í bænum á Fossi). Af aldri fólks að dæma gætu sumar þeirra verið teknar á árunum 1936 til 1946. Það væri mjög fróðlegt að vita hver eða hverjir hafa tekið þessar myndir. Gætu heimamenn á Fossi hafa átt myndavél á þessum árum? Eða hafa einhverjir gestir tekið myndirnar? Það er t.d. athyglisvert að Gyða sést ekki á neinni myndanna, þó er Kristján á einni mynd ekki eldri en svo að hún hlýtur eiginlega að hafa verið skammt undan. Tók hún kannski myndina?
Það hafa miklar vangaveltur af þessu tagi farið fram en mörgum spurningum er ósvarað. Allir, sem hafa eitthvað til þessara mála að leggja eru hvattir til að láta heyra frá sér.
Þá væri gaman að bæta þarna inn myndum af systkinunum frá Fossi á ýmsum aldursskeiðum. Það eru þarna nokkrar myndir af Hafsteini og Þórarni en fáar eða engar af öðrum. Þeir, sem eiga slíkar myndir, og væru fúsir að leyfa umsjónarmanni vefsins að skanna þær og bæta á síðurnar eru beðnir að rétta upp hönd. (27/10 2004, leiðrétt 31/10 2004)
Það er svolítið lífsmark með vefnum og hann þróast hægt og bítandi úr ættarmótsvef í ættarvef. Nú hefur bæst við dálítið efni sem umsjónarmaður vonast til að ættingjunum þyki áhugavert en því er ætlað að fræða um Foss og fólkið sem tengist þeim stað. Þarna er annars vegar um að ræða skrá um örnefni í landi Skjaldvararfoss sem Hafsteinn Guðmundsson tók saman árið 1977 og hins vegar gamlar myndir frá Fossi og af fólki sem tengist staðnum á einhvern hátt. Myndirnar eru enn ekki margar en vonast er til að þeim fjölgi á næstunni og hefur umsjónarmaður nú þegar í fórum sínum nokkrar góðar myndir sem hann mun skanna og bæta á vefinn við fyrsta tækifæri.
Það er ekki alltaf hlaupið að því að átta sig á hvað eða hverjir sjást á gömlum myndum. Reynt hefur verið að setja einhverjar upplýsingar með hverri mynd og naut umsjónarmaður þar góðrar aðstoðar þeirra Nínu og Ármanns. Það er þó enn margt óljóst um efni sumra myndanna, hvenær þær eru teknar og hver gæti hafa tekið þær. Þeir, sem geta lagt lið í því efni, eru beðnir að hafa samband við umsjónarmann. Þá má telja víst að margir lumi á myndum sem áhugavert væri að bæta í safnið. Umsjónarmaður tekur fúslega að sér að sækja slíkar myndir, skanna þær og skila frummyndinni aftur! (16/10 2004)
Vefurinn hefur nú tekið talsverðum breytingum. Ættarmótið, sem varð til þess að vefurinn komst á laggirnar, er löngu liðið og ef vefurinn á að lifa áfram hlýtur hann að laga sig að nýjum aðstæðum. Það verður svo að koma í ljós hvort hann á sér tilverugrundvöll þótt ekki sé ættarmót eða aðrir stórviðburðir í vændum.
Útlit vefsins er enn að mestu það sama og áður og meginhluti þess efnis, sem þar er að finna, var áður á ættarmótsvefnum og kemur því væntanlega kunnuglega fyrir sjónir. Vonandi tekst að finna nóg af nýju og sæmilega áhugaverðu efni til að ættingjunum finnist forvitnilegt að líta á hann öðru hverju. Umsjónarmaður mun reyna að hafa vakandi auga fyrir slíku efni en hann vonast einnig til að fá aðstoð frá áhugasömum lesendum.
Sú hugmynd var viðruð á gamla vefnum að efna til samkeppni um bestu ættarmótsmyndina. Fram að þessu hafa aðeins tveir, auk umsjónarmanns, sent myndir til að birta á vefnum. Það voru miklu fleiri sem voru drjúgir við myndatökur á ættarmótinu og áreiðanlega eru nú til margar ágætar myndir sem ættingjarnir hefðu gaman af að sjá. Þeir, sem luma á góðum myndum, eru hér með hvattir til að koma þeim á framfæri. Stafrænar myndir er best að senda í tölvupósti en góðar myndir á pappír er umsjónarmaður reiðubúinn að reyna að skanna eftir bestu getu.
Gestabókin er enn á sínum stað en hana má nota til að skiptast á skoðunum og koma á framfæri hugmyndum og óskum um efni á vefnum. Látið endilega heyra frá ykkur! (19/9 2004)
Foss að vetrarlagi
|
|
|
Kolaveiðar