BIRTINGUR    

Úr fréttabréfi maí-mánuðar 2001

Ágæti félagi.
Eigendaskipti BIRTINGS hafa gengið eins og best verður á kosið. Tarot-spilin vöktu almenna ánægju hjá félögum og hafa margir pantað annað eintak til að gefa vinum og vandamönnum. Enn er nokkur lager fyrirliggjandi, ef einhverjir vilja panta aukapakka.
Nokkuð hefur verið spurt um afþökkunarþjónustu í sama formi og var hjá fyrri eigendum. Því er til að svara að sú þjónusta er ekki fyrir hendi hjá okkur. Hins vegar kemur fréttabréf á undan hverri bók og ef fólk hefur alls ekki áhuga fyrir efninu, þá er hægt að skipta henni hjá forlaginu.
Bókaklúbbur byggist á öruggu félagatali. Til að hægt sé að gefa 30-40% afslátt verður móttakendafjöldi að vera þekkt stærð. Sá er munurinn á bókaklúbbi og póst- eða netverslun.
Bókaklúbbar hafa aukið markaðshlutdeild sína verulega hin síðari ár. Mjög margar fjölskyldur eiga aðild að einum eða fleiri bókaklúbbum af einhverju tagi. Það er nefnilega með bækur eins og mat, það þarf alltaf meira og meira. Bækur eru nauðsynleg næring fyrir sálarlífið og þekkingaröflun hvers einstaklings.

Að lesa er að lifa.
Á Íslandi og í nálægum löndum er bókakostur heimila yfirleitt allfjölbreyttur og talið er að mjög fáir hafi minnkað bókakaup hin síðari ár, þó að sjónvarp, myndbönd og tölvur séu nú orðin hvers manns eign.
Við hjá bókaútgáfunni SKJALDBORG vonum að bækur BIRTINGS verði kærkomið innlegg í bókasöfn íslenskra heimila og víkki sjóndeildarhringinn hjá allri fjölskyldunni.

Með kveðju,

Anna Fr. Kristjánsdóttir,
framkvæmdastjóri.

[Tilbaka]     [Maí-bók 2001]      [Ágúst-bók 2001]