Heimasíða um andleg málefni

Hvað sögðu þau?
Nokkur orð fólks um spíritisma og lífið eftir dauðann  / Síða  1 

Af öðrum síðum:

Dauðinn:                                                                                              Og dauðinn, hann er aðeins breyting öllum, og okkar jarðlífssvið, er útborg ein frá drottins dýrðarhöllum, og dauðinn bara hlið. Longfellow. Þýð.: Einar Hjörleifsson Kvaran. Ævar R. Kvaran, leikari: Vandi miðilsstarfsins "Hinir stórkostlegu skyggnihæfileikar sem Hafsteinn [Björnsson] bjó yfir voru fólki sífellt undrunarefni, auk þess sem margir telja sig standa í mikilli þakkarskuld við hann, sökum þess með hver dásamlegum hætti hann oft gat tengt fók með beinu sambandi við látna ástvini og þannig veitt mörgum huggun sem ekkert annað jafnaðist á við. Vitanlega kynntust margir Íslendingar sjaldgæfum hæfileikum þessa stórbrotna miðils, því hann fyllti stærstu samkomuhús landsins á svipstundu, ef hann gaf kost á skyggnilýsingafundi, og svo voru hinir, sem kynntust hæfileikum hans enn nánar á einkafundum. Ég geri ráð fyrir að margir þeirra sem aldrei kynntust persónulega þessari undragáfu sjái nú eftir því að hafa ekki notað eitthvert tækifæri til þess að kynnast henni meðan kostur var á því. En ég vil að þessu sinni aðeins bæta því við, að Hafsteinn tók það fram við mig hvað eftir annað, að hann teldi með öllu útilokað að hann hefði náð þessum mikla árangri sem miðill hefði hann ekki notið þjálfunar Einars skálds Kvarans og nokkurra sálrænna vina hans, sem þjálfuðu Hafstein svo aldrei brást. Þegar þess er gætt hve mikla meðfædda hæfileika Hafsteinn hafði hlotið í vöggugjöf, þá mun ýmsum koma það spánskt fyrir sjónir, að hann hefði samt orðið að fá svona mikla og langa þjálfun. Þetta kom meðal annars fram í því að fólk spurði tiltölulega skömmu eftir lát Hafsteins: "Hvað er þetta? Eruð þið ekki búnir að fá annan miðil?" Eins og hér hefði látist venjulegur skrifstofumaður. Það væri því ekki annað en auglýsa eftir öðrum! En til þess að vera góður miðill þarf meira en meðfædda hæfileika. Ég hygg að ef til vill mætti líkja því að verða góður miðill við að þroska góða tónlistargáfu. Það leikur enginn opinberlega á hljóðfæri öðruvísi en að hafa áður lagt af mörkum mikla vinnu og langa þjálfun. Ég tek þetta fram hér sökum þess, að það er bersýnilegt, að fólk hefur alrangar hugmyndir um það hvað þurfi til þess að verða góður miðill. Flestir virðast halda að til þess þurfi ekki annað en meðfædda hæfileika, en það er öðru nær." Heimild: Lesbók Morgunblaðsins, 17. sept. 1988 . Geir R. Tómasson, tannlæknir: "Spíritismi er bjartur og aðgengilegur fyrir leitandi fólk, því við trúum á áframhaldandi tilveru og að maðurinn sé að vissu leyti sinnar eigin gæfu smiður. Við búum okkur samastað fyrir handan með lífernii okkar á jörðinni og það hlýtur að auka ábyrgð hvers einstaklings. Þetta hvetur menn til að vanda líf sitt og skapar allt annað viðhorf en þeir hafa, sem trúa því að allt sé búið við dauðann. Við höldum þó ekki að menn séu leiddir fyrir einhvern strangan dómara þegar jarðvistinni lýkur. Við trúum því, að til sé algóður skapari alls, sem sé fullur kærleika en komi ekki fram sem dómari mannanna. Eini dómurinn sem við eigum í vændum , er sá dómur, sem við kveðjum sjálf upp, þegar okkur er sýnt allt okkar líf í skyndisýnum. Fólk, sem farið er héðan, segir að það fái að sjá eigið lífshlaup og skynji þá hvenær það hefur breytt rangt í jarðlífinu. Um leið og það sér eftir breytni sinni er það á réttri leið. Með því kveður maður upp dóm yfir sjálfum sér. Margir, sem komnir eru yfir, segjast sjá líf sitt í alveg nýju ljósi. [...] Kristur sagði bersyndugu konunni að fara og syndga ekki framar, en hann dæmdi hana ekki. Hann boðaði kærleika og fyrirgefningu. Og ef hver okkar sér hvað hann hefur gert rangt og biður um fyrirgefningu, þá fáum við hana. En skilyrðið er að maðurinn sjálfur sjái syndirnar, sem hann hefur drýgt. Hann getur ekki öðlast frið í sálu sinni fyrr en hann hefur horfst í augu við þær og er kominn í sátt við sjálfan sig." Heimild: Pressan, 26. janúar 1989. Ómar Ragnarsson, fréttamaður: Sem svar við spurningu blaðamanns MBL um hvort hann trúi á líf eftir dauðann: "Já, mér þykir það líklegt. Ég held að óendanleikinn og eilífðin, tvö svipuð hugtök sem eru ofar mannlegum skilningi, séu grunnur tilverunnar og alheimsins; að líf og dauði séu eins og tvær hliðar á sama peningi, ekkert líf án dauða og enginn dauði án lífs og að líf og dauði geti þess vegna skipst á til eilífðar. Þess vegna ekkert fráleitt að það sé líf eftir dauðann, alveg eins og það er dauði eftir lífið. Heimild: Morgunblaðið, sept. 2000. Jónas Ingimundarson, píanóleikari: Ófullgerðu lögin hans Sigfúsar "Við Sigfús Halldórsson vorum ágætir vinir og hann teiknaði raunar af mér mynd skömmu áður en hann dó. Nokkru eftir lát hans var ég staddur hjá góðri vinkonu minni og meðan við vorum að spjalla segir hún allt í einu: "Hann Sigfús Halldórsson er hérna hjá okkur, hann á erindi við þig, hann vill að þú hjálpir honum að ljúka við tvö lög sem hann átti ófrágengin þegar hann dó." Þessi kona talar sjaldan um yfirskilvitlega hluti og mér hnykkti svolítið við, ekki síst vegna þess að daginn áður hafði Friðbjörn G. Jónsson, sem unnið hafði mikið með Sigfúsi, hringt til mín og beðið mig að skrifa niður lag sem Sigfús hafði samið og þeir æft lítillega saman en hvergi var nú til varðveitt nema í huga Friðbjarnar. Ég vissi að konan gat með engu móti vitað neitt um það samtal né heldur hafa haft spurnir af þessu lagi með öðru móti. Þótt ég gæfi lítið út á það sem konan sagði hringdi ég í Friðbjörn og sagði honum að ég vildi gjarnan skrifa niður ófrágengna lagið hans Sigfúsar. "Raunar voru nú lögin tvö," svaraði Friðbjörn. Heimild: Morgunblaðið, 2. mars 1997. Steinunn Ólína Þorsteinsdóttir, leikkona: Trúir þú á líf eftir dauðann? Sv.: Nei, mamma lofaði að ganga aftur ef hún gæti, en það hefur ekki orðið af því og hún var ekki kona sem gekk á bak orða sinna. Heimild: SOS, spurt og svarað, Mbl. 17/11/2000.     Viltu lesa meira? Flettu þá á  síðu 2.

Annað efni á heimasíðu Verundar:

Til aðalsíðu    Leiðbeinendur að handan    Bækur um dulræn málefni    Fyrirboðar    Upphaf spíritisma á Íslandi

->