heimasíða um andleg málefni

Hvers vegna eruð þið á jörðinni? Ávarp bróður Bernards í gegnum miðilinn Lucy Hale.   Gott kvöld vinir mínir.                                                                                                   Það er mér ánægjuefni að koma hér á meðal ykkar einu sinni enn til þess að ræða við ykkur um stund, um leið og þið stígið skref ykkar á jarðsviðinu. Okkur langar að biðja ykkur að doka aðeins við og hugsa eitt andartak um það hvers vegna þið eruð hér. Hvað eruð þið að gera í efnislíkama, hvaðan komuð þið og hvert eruð þið að fara? Hver verður leið ykkar? Sérhvert ykkar, maður kona eða barn, allt það sem lifir ber einnig í sér anda. Anda, sem er sál ykkar, anda sem er eilífur. Hafið þið nokkurn tíma staldrað við og hugsað um hvað eilífð þýðir? Það þýðir að þið voruð til áður en þið komuð til jarðarinnar, alveg á sama hátt og þið munuð verða til þegar þið yfirgefið jarðsviðið. Þið komuð frá heimkynnum andans, andlega heiminum. Þið jarðarbúar gefið þeim stað ýmis nöfn. Þið kallið hann Sumarlandið, Himnaríki, Paradís, Heiminn fyrir handan og svo framvegis. En allt þetta er mjög óáþreifanlegt efnislíkama ykkar. Besta samlíkingin sem við getum gefið ykkur er að biðja ykkur að hugsa um útvarpsbylgjurnar, sjónvarpið, farsímana og sv. frv. Þið vitið að það eru alltaf að berast bylgjur og að þið þurfið að hafa tæki til þess að nema þær. Þegar þið hafið numið þær þá eruð þið komin í samband við uppsprettu þeirra. Án móttakarans eru þær ósýnilegar ykkur svo þið verðið ekki vör við þær. Samt vitið þið að þær eru til allt í kringum ykkur, og þannig er það líka með andann, vegna þess að þið hafið líkama, hafið tekið hluta af efninu, mótað það og byggt þannig að þið getið séð, snert, fundið, bragðað og lyktað. En allt þetta er af jarðneskum toga, þetta eru efnislegir hlutir. Líkami ykkar er líkt og kápa, ef þannig mætti segja, sem þið farið í svo þið getið innt af hendi ákveðið starf. Verkefni ykkar þegar þið komið á jarðsviðið er að læra, þroskast og vaxa. Þið hafið valið ykkur þá braut sem þið eruð á á jarðsviðinu. Ekki öll smáatriði en alla helstu þætti hennar. Þið bjugguð í andaheimi áður en þið komuð til jarðarinnar og þið völduð ykkar aðstæður, foreldra, og þann tíma sem þið vilduð koma á til jarðsviðsins að því athuguðu hvað þið gátuð séð fyrir um aðstæður þess sérstaka lífs sem myndi veita ykkur þau tækifæri sem  voru nauðsynleg, tækifæri sem myndu gera ykkur kleift, ef þið vilduð, að nudda af nokkur "horn" sem þið eruð með. Tækifæri sem myndi gera ykkur kleift að vaxa andlega, veita ykkur dýpri skilning, láta í té námsefni sem mun hafa bætt við anda ykkar þegar að því kemur að þið yfirgefið jarðsviðið að loknu verkefninu og komið til okkar í andaheiminum. Þið komið ekki með þá efnislegu hluti með ykkur sem þið hafið safnað að ykkur meðan á dvölinni á jarðsviðinu stóð. Þið munið hins vegar koma með þá reynslu sem þið hafið öðlast, þann persónuleika sem þið hafið þróað og kærleikann sem þið gátuð auðsýnt öðrum. Allt það sem myndar líf  ykkar á jörðinni mun gefa hina endanlegu niðurstöðu. Sál, sem er svolítið vitrari, svolítið þroskaðri, er komin svolítið lengra á þeirri leið sem að lokum mun leiða hana til Guðs. Oft spyrjið þið sjálf ykkur að því hvers vegna sumir hlutir þurfi að koma fyrir ykkur. Hvers vegna þarf ég að eiga í meiri erfiðleikum en sumir aðrir? Hvers vegna er svona auðvelt fyrir sumt fólk að komast í gegnum lífið. Það virðist hafa allt það sem það óskar sér, en ég þarf aftur á móti að berjast fyrir öllu. Hvers vegna þarf ég að vera heilsuveill og hvers vegna þarf sumt fólk að fæðast vanskapað, þroskaheft,  án þessa eða hins? Hvers vegna dvelja sumar sálir aðeins mjög stuttan tíma á jarðsviðinu áður en þær koma aftur til andaheimsins en aðrar virðast fara löngu eftir að efnislíkamar þeirra eru orðnir útslitnir? Það er vegna þess að það er nauðsynlegt. Til er reynsla sem aðeins er hægt að öðlast á jarðsviðinu en ekki í andaheimi. Til eru hlutir sem nauðsynlegt er fyrir annað fólk að læra í gegnum sérstakt líf. Fólk spyr, ef það missir barn, hvort sem það var fætt eða komst aldrei inn í heiminn, hver tilgangurinn sé með því að sálin fari af stað en þróist ekki. Sumt af þessu er vegna þess að þeir sem annt er um viðkomandi, foreldrarnir kannski, læknarnir, hjúkrunarfræðingarnir, þeir sem annast hina sjúku, þurfa að öðlast þá reynslu sem fylgir því að líta eftir, hlú að, jafnvel þó þau geti ekki bjargað í sumum tilfellum, samkvæmt  jarðneskum skilningi. Þú getur ekki sagt til um hver tilgangur lífs þíns er á meðan þú ert í jarðlíkamanum. Þú getur aðeins reynt að gera sem best úr kringumstæðum þínum, gera þér grein fyrir að ef þú ert á erfiðari göngu en samferðamenn þínir, þá gæti það verið vegna þess að þú ert svolítið þroskaðri andlega en þeir eru. Þú hefur þann styrk til að bera sem þarf til þess að yfirstíga þær hindranir sem verða á vegi þínum. Þú færð tækifæri til þess að velja á milli úrlausna. Þið getið alltaf fundið eitthvað í lífi ykkar sem verður ykkur til hjálpar andlega. Þið eruð lánsöm á þessum tíma vegna þess að þið getið tilbeðið á þann hátt sem þið teljið rétt. Það eru engin lög sem banna ykkur að sækja þá kirkju sem þið viljið, eða fylgja þeirri trú sem þið óskið. Að vísu, ef þið gerist spíritistar og komið í spíritistakirkju, þá getið þið svo sem búist við að verða fyrir vissu háði. Þið gætuð mætt fólki sem staðhæfir að þið séu á leið til fjandans, og sem hefur áhyggjur af ykkur þar sem þið séuð á leið til eilífrar útskúfunar. En hver einasta sál á jörðinni er þar í sama tilgangi. Til þess að læra. Það skiptir ekki máli hvaða trúarbrögðum viðkomandi hefur fylgt, þau leiða hann öll að lokum til andans, til Guðs. Eitt af því sem oft er sagt innan kirkna ykkar er setningin "dæmið ekki svo þið verðið ekki dæmd." Það ber að skilja að sérhvert ykkar er einstakt. Þú sérð hlutina frá öðrum sjónarhóli en allir aðrir. Engir tveir á jarðsviðinu eru alveg eins efnislega, svo þeir eru ekki eins í þróun sálarinnar, á því stigi sem þeir eru, í því sem þeir þurfa að öðlast. Hvert og eitt ykkar er einstaklingur og sem slíkur verður þú að skapa þér þína eigin vegferð, læra þína eigin lexíu. Þú getur ekki elt annað fólk í blindni. Þú getur hlustað á það sem sagt er, skoðað það sem berst til þín og ef þér finnst það vera rétt, það falli að skynsemi þinni, þú getir sagt um sem svo: Já, það er vit í þessu, þá er það leiðin þín. Einhver annar mun sjá það sama á allt annan hátt en þú. Okkur finnst oft að ef þið, fólkið á jarðsviðinu, sem eruð öll svo mismunandi, gætuð séð ykkur sjálf andlega, þá mynduð þið sjá, já, að þið eruð ólík, en samt svo lík sem birting andans. Þið getið öðlast efnislega hluti. Okkur finnst ekki að neinn á jarðsviðinu ætti endilega að neita sér um allt í því efni. Þið getið ekki hætt að lifa efnislegu lífi ykkar því það er í gegnum það sem þið lærið. En haldið andlegri viðleitni ykkar, haldið sambandinu við andann, hugleiðið, viðhaldið kærleika ykkar til leiðbeinenda ykkar og hjálpenda, og viðhaldið kærleikshugsunum ykkar til þeirra sem hafa horfið til lífsins fyrir handan. Munið alltaf, að á meðan að þið eruð á jarðsviðinu, þá eru aðstæður jarðarinnar þær mikilvægustu fyrir ykkur. Gefið ykkur tíma til þess að sinna jarðneskum metnaði ykkar, en takið frá vissan tíma til þess að hugsa um andann, tíma til hugleiðslu og bænar, tíma til þess að senda út kærleikshugsanir og heilun til þeirra sem þið hittið. Þú hittir ekki fólk fyrir tilviljun. Hver og einn sem þú hittir hefur sín áhrif, hvort sem þú gerir þér grein fyrir því eða ekki. Og á lífsgöngu þinni muntu hitta afar margt fólk af ýmsum þjóðernum, kynþáttum, menningu og litarhætti. Ef þú sendir sérhverju þeirra svolítið af kærleika þínum, brosir þegar þú hittir ókunnuga eða gerir lykkju á leið þína til þess að hjálpa öðrum, þá ertu að öðlast eitthvað, sem mun hjálpa þér að þróa þína eigin sál. Þú getur ekki stjórnað lífi annarra, þú getur ekki sagt öðrum hvað þeir ættu að gera og hvað ekki. Það eina sem þú getur gert er að reyna að benda þeim sem þú hittir, á, að lífið er meira en bara þetta efnislega. Reyndu að sýna þeim hvað það þýðir að vera spíritisti. Eitt af því sem er mikilvægt er að vera venjulegur, og í jarðneskum skilningi venjulegri en annað fólk. Stattu fast í báða fætur, eins og sagt er. Sinntu þeim tækifærum sem ber að höndum þér til þess að þjóna öðrum. Ef þú gerir það þá ertu að þjóna sjálfum þér. Eins og við höfum sagt hér áður, þá er það mikil blessun fyrir ykkur að vita eitthvað um andaheiminn. Það verður þér líka til blessunar þegar þú getur látið þá þekkingu ganga áfram til annarra sem eru leitandi í myrkri. Ef fólk er heiðarlegt í trú sinni, ef það er andlega sátt við það sem það fær, hvort sem það er frá ensku rétttrúnaðarkirkjunni, í kapellu eða hjá Hjálpræðishernum, og hvort sem fólk er múslimar eða búddistar, hindúar eða síkar, þá skiptir það ekki máli. Höfuðatriðið er að það sýni trúmennsku gagnvart því sem það trúir og þegar upp er staðið, tilbiðji Guð. Hinn nýtískulegi heimur ykkar er svo flókinn í dag. Það er svo mikil þekking til staðar en samt er svo margt sem enn þarf að læra. Þið þurfið að muna að jafnframt því að vera borgarar þessa lands, kaupstaðar eða þorps, þá eruð þið borgarar heimsins og jörðin ykkar þarf hvern þann kærleiksneista sem þið getið veitt henni. Þið finnið oft til vonleysis varðandi ástandið í heimi ykkar. Þið lesið á hverri blaðsíðu blaðanna um hræðilega hluti sem eiga sér stað og þið standið ykkur að því að spyrja sem svo: Er Guð til? Ef svo er hvernig í ósköpunum getur hann leyft að svona nokkuð gerist? Það er vegna þess að jörðin tilheyrir Guði og að hún er hluti af  "hinni miklu andlegu áætlun," að það verða líka harmleikir og hamfarir. En á sama tíma er von, því kærleikurinn er til í heimi ykkar. Ef ykkur væri kleift að sjá í hjörtu og huga alls þessa fólks, þá mynduð þið komast að raun um að það er svo mikið gott til þar. Þið þurfið endilega að senda út kærleika ykkar, ekki bara til þeirra sem næst ykkur standa, þeirra sem þið finnið til með, eða eruð sammála, heldur líka til allra lífvera Guðs, til alls mannkyns, þeirra slæmu jafnt og góðu, til dýranna, plantnanna, fuglanna, trjánna, fiskanna og skordýranna. Munið það, að allt það sem er hluti af lífinu er hluti af andanum, og mun að lokum sameinast ykkur á leiðinni til Guðs. Góða nótt og Guð blessi ykkur öll. Upphaf spíritisma á Íslandi      Leiðbeinendur að handan      Bækur um dulræn efni Hvað sögðu þau?      Fyrirboðar     Hvað er lífritmi?      Aðrar heimasíður      Andleg málefni - titilsíða Til aðalsíðu