Sunnudagur 15. janúar kl. 15:00

Óbyggðirnar kalla
(Call of the Wild).

Bandarísk kvikmynd frá 1972, byggð á samnefndri skáldsögu Jacks London (1876-1916) sem komið hefur út í íslenskri þýðingu Ólafs við Faxafen (Ólafs Friðrikssonar, ritstjóra og verkalýðsleiðtoga). Leikstjóri Kenneth Annakin; með aðalhlutverkið fer Charlton Heston.

Stuttur efnisútdráttur: Aðalhetja sögunnar er hundurinn Bokki, stór og kraftmikill blendingur af Sankti-Bernharðskyni og skosku fjárhundakyni, í eigu dómara eins í Santa-Clara dalnum. Dag einn er hundinum stolið og hann seldur til greiðslu á spilaskuld þjófsins, en síðan er Bokki sendur með skipi til Alaska þar sem franskættað par frá Kanada kaupir hann og þjálfar til sleðadráttar. Bokki er þar næst seldur karlinum Hal Charles og konunni Mercedes, sem hafa uppi stór áform um að auðgast á gullgreftri á norðurslóðum. Þau kunna ekkert til sleðaferða í óbyggðum eða umhirðu hunda og skella skolleyrum við áminningum um að fara varlega þegar snjóa tekur að leysa á vorin. Þau taka heldur ekkert mark á orðum Johns Thornton (Charlton Heston), reynds ferðamanns sem þau hitta af tilviljun á leið sinni. Þegar hann sér Hal misþyrma Bokka, sem er að þrotum kominn, vannærður og illa haldinn, grípur Thornton í taumana, bjargar hundinum og tekst að koma honum til heilsu aftur. Hundurinn reynist húsbónda sínum trúr og tryggur og bjargar lífi hans þegar snjóflóð hrífur hann með sér í skógarhöggsferð. Í einni kaupstaðarferð þeirra leggur John stórfé undir í veðmáli um kraft og hollustu Bokka - og vinnur. Thornton snýr aftur til gullleitar ásamt félögum sínum, og þá byrjar hundurinn að fara í könnunarferðir að næturlagi um nágrennið og kemst í kynni við flokk úlfa. Þegar Bokki snýr aftur til tjaldbúðanna eftir eina slíka skógarferð, finnur hann lík Johns Thornton og hinna félaganna, sem indíánar höfðu drepið í fyrirsát. Hundurinn hefnir dráps húsbónda síns grimmilega, en snýr síðan að fullu til vistar með úlfahópnum - óbyggðirnar kalla.

Enska. Án texta
Lengd 104 mínútur.

Sunnudagur 22. janúar kl. 15:00

Á botninum
(Les bas-fond).

Frönsk kvikmynd frá árinu 1936, byggð á leikriti Maxíms Gorkí sem sviðsett hefur verið þrívegis á Íslandi: í Þjóðleikhúsinu 1976 undir heitinu Náttbólið, 1985 af Íslenska leikhúsinu í Lindarbæ (Í djúpi daganna) og 2011 í Nemendaleikhúsinu (Á botninum). Leikstjóri þessarar myndar sem hér er sýnd var Jean Renoir (1894-1979), einn frægasti kvikmyndaleikstjóri Frakka fyrr og síðar. Í myndinni er leikrit Gorkís tekið allt öðrum tökum en sjá mátti í verki Kurosawa, sem MÍR sýndi í október sl. Hjá japanska meistaranum fær leikhópurinn að njóta sín, en Renoir byggir mynd sína að mestu á tveimur aðalpersónum, Pepel, sem leikinn er af Jean Gabin (1904-1976) og baróninum, sem leikinn er af Louis Jouvet (1887-1951), en þetta voru tveir af fremstu leikurum Frakka um miðja síðustu öld.

Franska. Enskur texti.
Lengd 95 mínútur.

Mánudagur 23. janúar kl. 20:00

Í djúpi daganna

Upptaka frá sýningu Íslenska leikhússins í Lindarbæ sjötta okt. 1995 á leikriti Gorkís, Á botninum (Na dné). Þýðing og aðlögun: Magnús Þór Jónsson, Megas; leikstjóri: Þórarinn Eyfjörð. Lengd um 90 mínútur. (Beðist er velvirðingar á því að myndgæði eru ekki eins og best verður á kosið, enda myndin tekin við erfiðar aðstæður).

Sunnudagur 29. janúar kl. 15:00

Vopnahlé
(Peremírie).

Rússnesk kvikmynd frá árinu 2010; leikstjóri Svetlana Proskúrina; höfundur tökurits Dmitrij Sobolév; meðal leikenda eru: Ivan Dobronravov, Júrij Itskov, Sergej Shnúrov, Nadezhda Tolubajeva og Aleksej Vértkov. Myndin gerist í ónefndu þorpi einhverstaðar í Rússlandi. Ungur vörubílstjóri, Jegor Matvejev að nafni, leggur upp í ferð án þess tilgangur sé ljós eða ákvörðunarstaður þekktur. Á leið sinni út í óvissuna rekst Jegor á gamla skólafélaga sína úr barnaskóla sem nú eru smákrimmar orðnir; hann hittir fagrar konur og hugsunin um að kvænast gagntekur hann um stund. Jegor hjálpar frænda sínum að ná út miklum fjárfúlgum af bankareikningi og aðstoðar síðar hann og lögreglumann einn við að endurheitma þýfi.

Rússneska. Enskur texti.
Lengd 95 mínútur..

Sunnudagur 5. febrúar kl. 15:00

Fall hinnar keisaralegu Romanov-ættar
(Padeníe dínastíi Romanovykh).

Sovésk heimildarkvikmynd frá árinu 1927, verk Esfir I. Shub (1894-1959), en hún gekk líka undir nafninu Esther Shub og var í hópi fremstu frumherja kvikmyndagerðar í Sovétríkjunum. Hún var fædd í vesturhluta Úkraínu sem þá var hluti rússneska keisaradæmisins, en vann löngum í Moskvu og starfaði ma. með Sergei Eisenstein við gerð fyrstu tveggja kvikmynda hans á þriðja áratug síðustu aldar (Verkfalls og Beitiskipsins Potjomkin). Esfir Shub er í hópi fremstu frumkvöðla í gerð heimildarkvikmynda, sem settar eru saman af efni úr ýmsum áttum. Fall hinnar keisaralegu Romanov-ættar er þekktasta mynd Esfir Shub og var hún fullgerð þegar áratugur var liðin frá Febrúarbyltingunni í Rússlandi 1917 og lokum rússneska keisaradæmisins. Í þrjú ár vann hún að gerð myndarinnar, skoðaði og rannsakaði ótal fréttamyndir sem teknar höfðu verið á árunum 1912-1917, þar á meðal myndasöfn í einkaeign Nikulásar II. Rússakeisara, myndskeið sem vinir keisarafjölskyldunnar höfðu tekið, fréttamyndir tveggja keisaralegra kvikmyndatökumanna og gömul söfn stríðsfréttamynda. Hún leitaði fanga víða utan Rússlands, ma. í Bandaríkjunum. Til þess að fylla í eyður sem mynduðust í þessu gamla myndefni tók hún sjálf upp myndskeið og raðaði í götin. Fall hinnar keisaralegu Romanov-ættar var fyrsta kvikmyndin sem Esfir Shub gerði um rússnesku byltinguna. Upphaflega var myndin þögul, en á árinu 1967 var hún hljóðsett í Mosfilm og stjórnaði Sergej Jútkevitsj, hinn kunni rússneski kvikmyndaleikstjóri, þeirri gerð myndarinnar og er hún sýnd hér. Kvikmynd þessi þykir merk heimild um þjóðfélagsástandið í Rússlandi á síðustu valdaárum Nikulásar II. keisara og í aðdraganda Október- byltingarinnar 1917. - Tónlistin, sem flutt er með myndinni, er eftir Johan Sebastian Bach, leikin á píanó.

Enskur texti.
Lengd 66 mínútur.

Sunnudagur 12. febrúar kl. 15:00

Stalker
Leikstjóri: Andrei Tarkovskíj

Ein af kvikmyndum Andreis Tarkovskíj, gerð 1979. Í aðalhlutverkunum eru Aleksandr Kajdanovskij, Anatolij Solonitsyn, Nikolaj Grinko og Alisa Freindlich. Tökuritið er samið af bræðrunum Boris og Arkadý Strúgatskíj og lauslega byggt á skáldsögu þeirra "Veisla í vegkantinum". Aðalpersónan í myndinni, sem er einskonar blanda af umrenningi og dýrlingi, leiðbeinir þeim sem þess óska - og þora - að fara um bannsvæði nokkurt, en þar eru hinar undarlegustu gildrur lagðar fyrir mennina tvo sem í leiðangrinum eru ásamt leiðsögumanni. Þetta er margræð, tyrfin og afar sérstæð kvikmynd, en í þessu verki sínu þykir hinn frægi rússneski leikstjóri Andrei Tarkovskíj hvað bölsýnastur.

Rússneska. Enskur texti.
Lengd 163 mínútur.

Sunnudagur 19. febrúar kl. 15:00

Brest-virkið
(Brestskaja krépost)

Rússnesk kvikmynd frá árinu 2010 um frækilega framgöngu varnarsveitar virkisins í landamæraborginni Brest, Hvíta-Rússlandi, á fyrstu dögum og vikum innrásar hersveita Þjóðverja í Sovétríkin í júní-mánuði 1941. Leikstjóri Alexander Kott, tökurit eftir Igor Úgolnikov og Vladimír Jerjonin. Meðal helstu leikenda: Andrej Merzlikin (leikur Andrej Kizhevatov, foringja níundu framliðasveitarinnar), Pavel Derevjanko (Jefim Finin) og Veronika Nikonova (Anja Kizhevatova).

Virkið í Brest var hið stærsta sinnar gerðar í rússneska keisaradæminu, þegar það var fyrst reist á árunum 1836-1842 á eyju einni, þar sem árnar Múkhavets og Búg renna saman í Hvíta-Rússlandi, nálægt landamærum Póllands. Virkið kom mjög við sögu í fyrri heimsstyrjöldinni og á næstu áratugum. Um skeið eftir 1930 var þarna starfrækt alræmt pólskt fangelsi, en frægast er það fyrir hetjulega vörn sovéskrar herdeildar á upphafsdögum innrásar Þjóðverja í Sovétríkin sumarið 1941.

Rússneska. Enskur texti.
Lengd 133 mínútur.

Sunnudagur 26. febrúar kl. 15:00

Petrúshka í öðru veldi

Sýningar tveggja af fremstu og frægustu listdansflokkum heims, Bolshoj-flokksins í Moskvu og Kírov-flokksins í Sankti-Pétursborg, á klassiskum ballett við tónlist Igors Stravinskíj (1882-1971), eins af vinsælustu verkum tónskáldsins fræga. Í flutningi þessara frábæru ballettflokka er tónlistin sú sama en danssýningarnar afar ólíkar. Bolshojflokkurinn byggir á aldargömlu verki danshöfundarins Mikhaíls Fokin (1880-1942), en stjórnandi sýningarinnar er Andris Liepa. Danshöfundur Kirov-sýningarinnar, Oleg Vinogradov, fer allt aðra leið en Fokin í sinni kóreógrafíu. Tvær ólíkar sýningar sem fróðlegt er að bera saman.

Sýning Bolshoj-dansflokksins er um 35 mínútur. Sýning Kírov-ballettsins tekur um 40 mínútur.
Kaffihlé á milli sýninga.